ಲೋಕಲ್ ನ್ಯೂಸ್ : ಬಸವರಾಜ ಹಳ್ಳಿ
ಸಿಂಧನೂರು, ಅಕ್ಟೋಬರ್ 12
ನಗರದ ಕುಷ್ಟಗಿ ಮಾರ್ಗದ ರಸ್ತೆಯಲ್ಲಿರುವ ತಾಲೂಕು ಕ್ರೀಡಾಂಗಣದಲ್ಲಿ ದಸರಾ ಉತ್ಸವ ಸಮಿತಿ ಶುಕ್ರವಾರ ರಾತ್ರಿ ಹಮ್ಮಿಕೊಂಡಿದ್ದ ‘ಯುವ ದಸರಾ’ ಕಾರ್ಯಕ್ರಮದಲ್ಲಿ ನಾಡಿನ ಖ್ಯಾತ ಹಿನ್ನೆಲೆ ಗಾಯಕ ವಿಜಯ ಪ್ರಕಾಶ್ ಮತ್ತು ಅನುರಾಧಾ ಭಟ್ ಅವರ ತಂಡ ಸಂಗೀತ ರಸದೌತಣವನ್ನೇ ಉಣಬಡಿಸಿದರು. ಕಿಕ್ಕಿರಿದು ತುಂಬಿದ್ದ ಶಾಲಾ ಆವರಣದಲ್ಲಿ ಗಾಯಕರು ಸಿನಿ ಗೀತೆಗಳನ್ನು ಹಾಡುತ್ತಿದ್ದಂತೆ ಪ್ರೇಕ್ಷಕರ ವಲಯದಿಂದ ಬಾರಿ ಕರತಾಡನ ಕೇಳಿಬಂತು. ಇತ್ತೀಚಿನ ಹೊಸ ಸಿನಿಮಾ ಹಾಗೂ ಹಳೆಯ ಸಿನಿ ಹಾಡುಗಳನ್ನು ವಿಜಯಪ್ರಕಾಶ್ ಹಾಗೂ ಅನುರಾಧಾ ಭಟ್ ಅವರ ತಂಡ ಹಾಡುವ ಮೂಲಕ ರಂಜಿಸಿದರು.
ಬೊಂಬೆ ಹೇಳುತೈತೇ ನೀನೇ ರಾಜಕುಮಾರ
ಖ್ಯಾತ ಕನ್ನಡ ತಾರೆ ಪುನಿತ್‌ರಾಜ್ ಕುಮಾರ್ ಅಭಿನಯದ ಬೊಂಬೆ ಹೇಳುತೈತೆ, ನೀನೇ ರಾಜಕುಮಾರ ಹಾಡಿಗೆ ಯುವಕರು ಕುಣಿದು ಕುಪ್ಪಳಿಸಿದರು. ಈ ಹಾಡಿಗೆ ಪ್ರೇಕ್ಷರೆಲ್ಲರೂ ಮೊಬೈಲ್‌ನ ಟಾರ್ಚ್ ಬೆಳಗಿಸುವ ಮೂಲಕ ಹರ್ಷೋಲ್ಲಾಸ ವ್ಯಕ್ತಪಡಿಸಿದರು. ಸಿನಿ ಹಾಡುಗಳ ಮೂಲಕ ಪ್ರೇಕ್ಷಕರನ್ನು ರಂಜಿಸಿದ ಕಲಾವಿದ ವಿಜಯ್ ಪ್ರಕಾಶ್ ಅವರನ್ನು ಶಾಸಕ ಹಂಪನಗೌಡ ಬಾದರ್ಲಿ, ಮಾಜಿ ಸಂಸದ ಕೆ.ವಿರೂಪಾಕ್ಷಪ್ಪ, ಮಾಜಿ ಸಚಿವ ವೆಂಕಟರಾವ್‌ ನಾಡಗೌಡ ಸನ್ಮಾನಿಸಿ ಗೌರವಿಸಿದರು.
ಸಿನಿ ಶೈಲಿಯ ಭವ್ಯ ವೇದಿಕೆ
ಯುವ ದಸರಾ ಹಿನ್ನೆಲೆಯಲ್ಲಿ ತಾಲೂಕು ಕ್ರೀಡಾಂಗಣದಲ್ಲಿ ಸಿನಿಮಾ ಶೈಲಿಯಲ್ಲಿ ಭವ್ಯ ವೇದಿಕೆ ಹಾಕಿ, ಸಾರ್ವಜನಿಕರಿಗೆ ಆಸನ ವ್ಯವಸ್ಥೆ ಮಾಡಲಾಗಿತ್ತು. ಕಾರ್ಯಕ್ರಮಕ್ಕೆ ಅಪಾರ ಜನಸಾಗರವೇ ಹರಿದುಬಂದಿತ್ತು. ರಾತ್ರಿ 7 ಗಂಟೆ ಸುಮಾರಿನಿಂದ ಆರಂಭವಾದ ಕಾರ್ಯಕ್ರಮ ಬಹಳ ಹೊತ್ತಿನವರೆಗೂ ನಡೆಯಿತು. ವಿಜಯ್‌ಪ್ರಕಾಶ್, ಅನುರಾಧಾ ಭಟ್ ಸೇರಿದಂತೆ ಇನ್ನಿತರೆ ಕಲಾವಿದರು ಸಿನಿಮಾ ಸೇರಿದಂತೆ ಜನಪದ ಹಾಡುಗಳಿಗೆ ಧ್ವನಿಯಾದರು.
