ಲೋಕಲ್ ನ್ಯೂಸ್: ಬಸವರಾಜ ಹಳ್ಳಿ
ನಮ್ಮ ಸಿಂಧನೂರು, ಅಕ್ಟೋಬರ್ 07
ನಗರದಲ್ಲಿ ದಸರಾ ಉತ್ಸವ ಸಮಿತಿ ವತಿಯಿಂದ ಸಿಂಧನೂರು ರೈತ ದಸರಾ ಉತ್ಸವ 2024 ಅಂಗವಾಗಿ ‘ನಮ್ಮ ನಡಿಗೆ ಸಿರಿಧಾನ್ಯ ಮತ್ತು ಸಾವಯವ ಕಡೆಗೆ’ ಎಂಬ ಘೋಷ ವಾಕ್ಯದೊಂದಿಗೆ ಹಮ್ಮಿಕೊಂಡಿದ್ದ ಸಿರಿಧಾನ್ಯ ರೋಡ್‌ಶೋಗೆ ಸೋಮವಾರ ಬೆಳಿಗ್ಗೆ ಚಾಲನೆ ನೀಡಲಾಯಿತು.
ನಗರಸಭೆ ಆವರಣದಲ್ಲಿ ಶಾಸಕ ಹಂಪನಗೌಡ ಬಾದರ್ಲಿ, ಮಾಜಿ ಸಂಸದ ಕೆ.ವಿರೂಪಾಕ್ಷಪ್ಪ ಹಾಗೂ ಮಾಜಿ ಸಚಿವ ವೆಂಕಟರಾವ್ ನಾಡಗೌಡ ಅವರು ರೋಡ್‌ಶೋಗೆ ಚಾಲನೆ ನೀಡಿದರು.
ನಗರಸಭೆಯಿಂದ ಎಪಿಎಂಸಿ ಆವರಣದವರೆಗೂ ರೋಡ್ ಶೋ ನಡೆಯಿತು. ರೋಡ್ ಶೋನಲ್ಲಿ ಜೆಡಿಎಸ್‌ನ ಬಸವರಾಜ ನಾಡಗೌಡ, ವೈದ್ಯರಾದ ಬಿ.ಎನ್.ಪಾಟೀಲ್, ಎಂ.ದೊಡ್ಡಬಸವರಾಜ, ಅಶೋಕಗೌಡ ಗದ್ರಟಗಿ, ತಹಸೀಲ್ದಾರ್ ಅರುಣಕುಮಾರ ದೇಸಾಯಿ, ನಗರಸಭೆ ಪೌರಾಯಕ್ತ ಮಂಜುನಾಥ ಗುಂಡೂರು, ಕೃಷಿ ಇಲಾಖೆಯ ಜಿಲ್ಲಾಮಟ್ಟದ ಅಧಿಕಾರಿ ಜಯಪ್ರಕಾಶ, ಸೇರಿದಂತೆ ಕೃಷಿ ಇಲಾಖೆಯ ತಾಲೂಕು ಮಟ್ಟದ ಅಧಿಕಾರಿಗಳು, ವಿವಿಧ ಪಕ್ಷಗಳ ಪದಾಧಿಕಾರಿಗಳು ಸೇರಿದಂತೆ ಯುವತಿಯರು, ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ಭಾಗವಹಿಸಿದ್ದರು.
ಬಿಳಿ ಟೀ ಶರ್ಟ್‌ನಲ್ಲಿ ಮಿಂಚಿದ ಜನಪ್ರತಿನಿಧಿಗಳು
ಶಾಸಕ ಹಂಪನಗೌಡ ಬಾದರ್ಲಿ, ಮಾಜಿ ಸಂಸದ ಕೆ.ವಿರೂಪಾಕ್ಷಪ್ಪ, ಮಾಜಿ ಸಚಿವ ವೆಂಕಟರಾವ್ ನಾಡಗೌಡ ಸೇರಿದಂತೆ ವಿವಿಧ ಪಕ್ಷಗಳ ಜನಪ್ರತಿನಿಧಿಗಳು ಬಿಳಿ ಟೀ ಶರ್ಟ್ ತೊಟ್ಟುಕೊಂಡು ನಗರಸಭೆಯಿಂದ ಕಿತ್ತೂರು ರಾಣಿ ಚನ್ನಮ್ಮ ಸರ್ಕಲ್, ಕನಕದಾಸ ಸರ್ಕಲ್, ಗಾಂಧಿ ಸರ್ಕಲ್ ಹಾಗೂ ಬಸವೇಶ್ವರ ಸರ್ಕಲ್ ಮೂಲಕ ಎಪಿಎಂಸಿವರೆಗೆ ಹೆಜ್ಜೆಹಾಕಿದರು. ರೋಡ್‌ಶೋನೊಂದಿಗೆ ಡೊಳ್ಳು ಕುಣಿತ ಸಾರ್ವಜನಿಕರನ್ನು ಆಕರ್ಷಿಸಿತು.
